Neftçala rayonunun içməli su çatışmazlığından əziyyət çəkən kənd və qəsəbələrinin su təchizatının yaxşılaşdırılması məqsədilə icra olunan layihənin birinci mərhələsi yekunlaşıb.

Azərbaycan Respublikasının Prezidenti İlham Əliyevin tapşırıqlarına əsasən Azərbaycan Dövlət Su Ehtiyatları Agentliyi tərəfindən Neftçala rayonunda icra olunan layihə çərçivəsində Pirəbbə, Aşağı Surra, Aşağı Qaramanlı, Astanlı, Dördlər, Xıllı, Ballıcalı və başqa kəndlərinin, həmçinin Bankə qəsəbəsinin içməli su təchizatı yaxşılaşdırılıb. Şirvan-Muğan qrup su kəmərindən 2020-ci və 2023-cü illərdə Neftçala rayonuna çəkilmiş 2 magistral su kəməri rayon mərkəzi ilə yanaşı, kənd və qəsəbələrin də içməli su təminatı üçün əlverişli imkan yaradıb. Hazırda yeni yaradılmış infrastrukturdan 18 yaşayış məntəqəsinə çıxışlar verilib və daşıyıcı su xətləri çəkilib. Hazırda həmin kəndlərin su təchizatı ümumi istifadə üçün quraşdırılmış bulaqlar hesabına aparılır.

Eyni zamanda magistral kəmərlərdən uzaqlıqda yerləşən 9 yaşayış məntəqələrinin içməli su təchizatının yaxşılaşdırılması üçün 5 ədəd subartezian quyusu qazılıb, quyu sularının keyfiyyətinin standartlar səviyyəsinə çatdırılması məqsədilə 6 ədəd əks-osmos tipli qurğu quraşdırılıb. Layihə çərçivəsində Bankə qəsəbəsində 39 km mərkəzləşdirilmiş içməli su şəbəkəsi yaradılıb və 1700 ünvana ev birləşməsi verilərək sayğaclar quraşdılıb. Hazırda qəsəbə sakinləri keyfiyyətli içməli su ilə təmin olunur.

Ümumilikdə icra olunan layihələr çərçivəsində Neftçala rayonunun kənd və qəsəbələrində 90 km olan içməli su xətləri inşa edilib. Layihə çərçivəsində 30 minədək kənd sakini keyfiyyətli və dayanıqlı içməli su ilə təmin edilib.

Layihənin növbəti mərhələsində Neftçala rayonunun 11, eləcə də Salyan rayonunun 6 kəndinin içməli su təchizatının yaxşılaşdırılması məqsədilə Şirvan-Muğan qrup su kəmərindən yeni magistral su kəməri inşa ediləcək. Artıq bu layihə üzrə tender proseduru yekunlaşıb və yaxın günlərdə tikinti işlərinə başlanılacaq.