"Əminəm ki, Qlobal Bakı Forumunda müzakirələr beynəlxalq gündəmdə dayanan məsələlərin həllində yeni yanaşmalar qurmağa kömək edəcək". Bu sözləri Prezident İlham Əliyev 2022-ci il iyunun 16-da "Qlobal dünya nizamına təhdidlər" mövzusunda IX Qlobal Bakı Forumunun açılışında bildirib.
Ümumiyyətlə, Qlobal Bakı Forumları dünyanın bir çox ölkəsindən liderləri, biznes nümayəndələrini, mütəfəkkirləri və ekspertləri bir araya gətirən mühüm tədbirdir. Forum qlobal problemlərin geniş spektrinə toxunmaqla yanaşı, aparıcı mütəxəssislərə və liderlərə öz fikirlərini bölüşmək və müzakirə etmək imkanı verir. Qeyd edək ki, ötən il keçirilən forumda 50-dən çox ölkədən 400-ə qədər ali və yüksək səviyyəli nümayəndə, həmçinin onlayn formada iştirakçılarla yanaşı, 300-ə yaxın şəxs əyani formada iştirak edib. Bu göstərici 2021-ci ilə nəzərən xeyli çoxdur. Əlbəttə ki, bu da forumda aparılan müzakirələrin cəlbedici olduğunu, həmçinin hazırda bu platformaya ehtiyacın olduğunu nümayiş etdirir. Forumda iqtisadiyyat, enerji, davamlılıq, texnologiya, biznes, təhsil, səhiyyə, beynəlxalq əlaqələr və mədəniyyət mövzusunda müzakirə aparılıb. Şübhəsiz ki, təhlil olunan mövzular dünyada baş verən hadisələri və tendensiyaları əks etdirir və qlobal problemlərin həllinə töhfə vermək üçün mühüm ideyalar və strategiyalar təklif edir.
Ölkəmizin belə mötəbər bir foruma ev sahibliyi etməsi, əlbəttə ki, çox mühüm hadisədir. Bu Azərbaycanın mədəni, iqtisadi, həm də siyasi baxımdan dünyada tanınması ilə yanaşı, onun etibarlı və təhlükəsiz ölkə kimi daha da nüfuz qazanması deməkdir. Bu kimi tədbirlər ölkəmizin beynəlxalq münasibətlərdə oynadığı rola dinamika gətirir.
Müzakirə edilən əsas məsələlərdən biri təhlükəsizlik məsələsi olub. Azərbaycan Prezidenti liderlər və nümayəndələrə bu mövzuda çağırış edib. Prezident İlham Əliyev bildirib ki, hər bir dövlət dünyanı daha da təhlükəsiz etmək üçün bir-biri ilə daha yaxından çalışmalıdır. Ölkə başçımız buna Qarabağda yaşayan erməni azlıqların sahib olduqları hüquqları nümunə göstərib. Orada yaşayan əhali Azərbaycanda yaşayan digər millətlər kimi tam azadlığa və hüquqa sahibdir.
Bundan sonra dövlət başçımız Qarabağda yaşayan erməni azlıqlar barədə danışıb: "Əlbəttə, Azərbaycanın Prezidenti olaraq mən ölkəmizin təhlükəsizliyi ilə bağlı məsələlər üzərində çalışıram və Qarabağ münaqişəsinin həlli, zənnimcə, regionda təhlükəsizlik üçün, regionda sülh üçün bir fürsətdir. Keçən dəfə görüşəndə mən işğal, dağıntı və xalqımızın demək olar ki, otuz il əziyyət çəkdiyi humanitar böhranla bağlı məsələyə geniş şəkildə toxundum. Bunları təkrarlamaq istəmirəm, bunlar artıq məlumdur. Çünki işğaldan azad edilmiş ərazilərdə o qədər ziyarətçilər - siyasətçilər, ictimai xadimlər, jurnalistlər, vətəndaş cəmiyyətinin nümayəndələri olublar, onlar hər şeyi, erməni işğalından sonra hansı dağıntıların qaldığını öz gözləri ilə görüblər".
Bununla yanaşı, Prezident İlham Əliyev ölkəmizlə Ermənistan arasında sərhədlərin delimitasiyası işləri ilə bağlı məlumat verib, regionda kommunikasiyaların bərpasının, xüsusilə də Zəngəzur dəhlizinin açılmasının gələcək regional sülhün fundamental elementlərindən olduğunu qeyd edib. Hayastan normallaşmaya doğru addım atmadığı müddətdə sülh haqqında danışmaq çətindir. Əlbəttə, belə olduğu təqdirdə, Azərbaycanın iki ölkənin birgə yaşayıb və normal qonşuluq münasibətlərinin qurulmasına yönəlmiş bütün səyləri uğursuz olacaq. Həmçinin Prezident İlham Əliyev Azərbaycanın işğaldan əziyyət çəkmiş ölkə kimi sülhü və normallaşmanı tələb etməyə böyük mənəvi haqqı olduğunu vurğulayıb. Şübhəsiz ki, ölkəmiz Cənubi Qafqazda daimi sülhün bərqərar olmasını milli prioritet sayır. Bu məsələdə Zəngəzur dəhlizinin mövcudluğunun da böyük rol oynayacağı bildirilib.
Azərbaycan öz həqiqətlərini dünyaya olduğu kimi çatdırıb. Bu gün mövcud olan bir çox qurum və təşkilatların verdiyi vəd və sözlər ölkəmiz üçün əhəmiyyətsizdir. Forum çərçivəsində bildirilib ki, hazırda ATƏT-in keçmiş Minsk qrupunun heç bir fəaliyyəti yoxdur. Bu kimi təşkilatların həyata keçirməli olduğu məsələləri, Azərbaycan öz gücünə, siyasətinə arxalanaraq həll edib. İstər Qarabağ, istərsə də digər bir çox məsələlər Azərbaycanın daxili məsələsidir.
İki gün davam edən Forumun əhəmiyyəti ondan ibarətdir ki, o, bütün dünyada qlobal problemlərin həlli yollarının müzakirəsi və təqdimatı üçün mühüm platformadır. Forum hər il beynəlxalq ictimaiyyətin diqqətini cəlb edən əsas məsələlərə toxunur və dünya liderləri ilə digər əsas aktorlar arasında əməkdaşlıq və dialoqa təşviq edir. Həmçinin dünya, biznes liderlərinə və digər əsas aktorlara yeni əməkdaşlıqlar qurmaq, effektiv siyasət aparmaq və daha yaxşı gələcək üçün bir araya gəlməyə imkan verir. Ona görə də forumun böyük əhəmiyyəti var.
Töhfə SƏMƏDOVA,
"Respublika".
