Bir əl sıxmaq görün nələrə qadirdir
Salamlaşdığınız zaman əl sıxarkən bədən dilinizin sizin haqqınızda nə qədər məlumat verdiyini bilirdinizmi? Bəli, bəzən bir kəlmə belə demədən, sadəcə əl sıxmaqla qarşı tərəfə çox şey söyləyə bilərsiniz.
Məsələn, bu ritualı edərkən hər iki şəxsin də tək əlindən istifadə edərək bir-birinin əlini möhkəm sıxması və bu ərəfədə kiminsə əlinin digərininkinin üstündə olmaması tərəflərin özünə inamının əlamətidir. Bu, həmçinin tərəflərin biri-birilərini eyni səviyyədə görməsi deməkdir.
İki əllə salamlaşmaq isə adətən qarşı tərəfə dəstək vermək niyyətində olduğuna işarə edir. Bu, sadə dillə desək, "sən mənim üçün önəmlisən və yanındayam" deməkdir. Əgər biri sizinlə salamlaşarkən əlinizi var gücü ilə sıxarsa, bu, həmin şəxsin sizə qarşı aqressiv olduğunu və bununla da açıq bir şəkildə sizə meydan oxuduğunu hiss etdirmək istədiyini göstərir.
Qarşınızdakının əlini qoparacaqcasına sıxması kimi, zəif əl sıxmaq da bir o qədər xoş qarşılanmır. Psixoloqlar əslində, qarşı tərəfə olan münasibətə görə əl sıxıldığını söyləyirlər. Hətta iş görüşmələri zamanı bu ritualın göz təması ilə üst-üstə düşməsinin də vacib olduğu bildirilir. Belə ki, bədən dili iş görüşmələrində çox böyük əhəmiyyət kəsb edir. Bu ərəfədə nə söylədiyiniz qədər, nə etdiyiniz də önəmlidir. Unutmayın ki, bu ritualın müəyyən qaydalarına riayət etməklə bir çox görüşmələrdən müsbət nəticələr əldə etmə şansınız da arta bilər.
Tısbağalar niyə çox yaşayır?
Tısbağalar uzunömürlülükləri ilə ən çox diqqətçəkən heyvanlardan biridir. Elə bu səbəbdən də cizgi filmlərində adətən müdrik personajlar kimi canlandırılır. Bu astagəl heyvanların yaşam sirri daim alimlərin maraq dairəsində olub və indiyə qədər mövzu ilə bağlı bir çox araşdırmalar aparılıb. Bu yaxınlarda aparılan araşdırmada onların yaşlanma prosesində ləngimənin olduğu ortaya çıxıb.
Yaşlanmaq bizim üçün həyatın qaçılmaz bir gerçəyi olsa da, bəzi tısbağa növləri üçün bu, belə deyil. İki yeni araşdırmadan toplanan dəlillər bir neçə tısbağa növünün biz insanlar kimi yaşlanmadığını göstərir. Qocalmanın zəiflədici və hüceyrələri məhv edən təsirlərinin bu heyvanlardan yan keçdiyi görünür. Belə ki, “Testudines" tısbağalarının yaşlanmanı ləngitmək, hətta dayandırmaq bacarığına sahib olduqları məlum olub. “Science” jurnalında dərc olunan yeni araşdırmada, 107 vəhşi populyasiyadan 77 növ tısbağa üzərində aparılan uzunmüddətli tədqiqatlardan əldə edilən məlumatlardan istifadə edən alimlər, bu heyvanların müasir insanlardan daha ləng yaşlandığını söyləyirlər. Qeyd edək ki, bura təkcə tısbağalar deyil, həm də amfibiya, ilan və timsahlar daxildir.
Alimlər bu soyuqqanlı heyvanların uzunömürlülüyünün səbəbini quşlar və məməlilərlə müqayisədə daha ləng həyat tərzi keçirmələri və onların sümük qədər möhkəm anatomik çanaq
quruluşuna sahib olmaları ilə əlaqələndirirlər. Üstəlik tısbağaların digər heyvanlar tərəfindən ovlanmaması bu ehtimalı daha da qüvvətləndirir.
Nostaljinin də xeyri var imiş...
Keçmişin həsrətini çəkərək o günləri xatırlamaqla əslində beyninizə müsbət siqnallar göndərmiş olduğunuzu bilirdinizmi? Araşdırmalar nostalji hissinin sağlamlığımız üçün çox faydalı olduğunu göstərir.
Depressiya, fiziki yorğunluq, ağrı və ya xroniki xəstəliklər... Hər bir insanın başına gələ biləcək bu xəstəliklərin çarəsi keçmiş zamanlara səyahət etməkdə ola bilər.
“Journal of Neuroscience” jurnalında dərc olunan araşdırmaya görə nostalji hissi ağrı və kədəri yüngülləşdirə bilən çox güclü təsirə malikdir. Yəni, fiziki ağrılar və ya əhvali-ruhiyyənin pozulduğu bir zamanda keçmiş günləri xatırladan fotoşəkilə baxmaqla ağrılar yüngülləşə bilər.
"Fiziki ağrıların bir qismi əslində, psixolojidir. Çünki ağrıları beynimizlə hiss edirik. Vücudumuzda hər nə qədər ağrı reseptorları olsa da, onu qəbul edən beynimizdir. Beynimiz o qədər qeyri-adi bir orqandır ki, heç bir bioloji səbəb olmadan da, ağrı hiss edə bilərik. Məsələn, bəzi insanların stresden mədə, qarın, hətta ürəkləri belə ağrıyır. Kədərləndiyimiz zaman yaşadığımız fiziki ağrıları daha güclü hiss edirik. Araşdırmalarımız nostalji hissinin, yəni keçmişdə yaşanan xoş günlər, uşaqlıq xatirələri, universitet, məktəb illərini xatırlamağın psixologiyaya müsbət təsir edərək ağrı və iztirab hissini azaltdığını göstərir”,-deyə araşdırma müəlliflərindən biri izah edib.
Dünyanın ən böyük bitkisi tapıldı
Avstraliyalı alimlər bu yaxınlarda dünyanın ən böyük bitkisini tapıblar. Avstraliyanın qərb sahillərində, Shark körfəzində aşkar edilən su bitkisinin 180 kilometr uzunluğunda olduğu açıqlanıb.
Cənubi Avstraliyanın Flinders Universiteti və Qərbi Avstraliya Universitetinin tədqiqatçıları təxminən 200 kvadratkilometr əraziyə yayılmış dənizotunun "Posidonia australis" növündən olduğunu söyləyirlər. Elm adamları bu nəhəng orqanizmin ən azı 4500 yaşında olduğunu təxmin edirlər. Həmçinin bitkinin tək toxumdan geniş bir əraziyə yayıldığı müəyyən edilib.
"Bitkinin bu qədər uzun müddət necə sağ qalması və böyüməsi bizim üçün çox maraqlıdı. Bu haqda hələ ki, dəqiq bir fikir deyə bilmirik, çünki çaşqınlıq yaradan bir neçə məqam var. Odur ki, araşdırmalarımız davam edir”,- deyə Flinders Universitetinin ekoloqu və tədqiqatın müəllifi Martin Breed qeyd edib.
Bölgədə ətraf mühit dəyişikliyinin müşahidə edildiyini ifadə edən Breedin sözlərinə görə, otun yayıldığı ərazidəki suda 17 ilə 30 dərəcə selsi arasında geniş temperatur aralığı var. Alim belə bir şəraitdə normal dəniz suyunun duzluluğunun ikiqat artdığını və bu şərtlərin çox vaxt bitkilər üçün kifayət qədər stress yaratdığını söyləyib.
Tədqiqatçılar bilavasitə, bitkinin öz analoqlarından iki dəfə çox xromosoma malik olduğunu və müdaxilə edilmədiyi təqdirdə, böyüməyə davam edəcəyini bildiriblər.
Qeyd edək ki, komanda bitkinin dəyişkən şəraitdə necə sağ qaldığını daha yaxşı başa düşmək üçün araşdırmalarını davam etdirir.
Hazırladı:
Elenora HƏSƏNOVA,
"Respublika".