Qarabağ müharibəsində qanı bahasına xalqına qələbə sevincini yaşadan Azərbaycanımızın qəhrəman övladlarından biri də 13 aprel 1989-cu ildə Lerik rayonu, Bibihoni kəndində dünyaya göz açan Tərzan Qəhrəman oğlu Həşimovdur. Bu Vətən sevdalısı 30 il düşmən tapdağında qalan əzəli yurd yerimiz olan Qarabağın azadlığı uğrunda müharibə meydanında şəhidlik zirvəsinə ucalmaqla örnək olacaq bir tarix yazdı. Lerik camaatı həmişə öz qəhrəman oğlunun adını fəxrlə çəkir, onunla qürur duyur.
Şəhid Tərzan Həşimov 2010-cu il mart ayının 6-da Müdafiə Nazirliyinin əmri ilə gizir hərbi rütbəsi almış və Gəncə şəhərində yerləşən "N" saylı hərbi hissədə motoatıcı tağım komandirinin müavini vəzifəsində xidmət etməyə başlayıb. 2016-cı ilin Aprel döyüşlərinin iştirakçısı olmuşdur. Azərbaycan Ordusunun Xüsusi Təyinatlı Qüvvələrinin giziri olan Tərzan Həşimov 2020-ci il sentyabrın 27-də başlanan Vətən müharibəsi zamanı Cəbrayıl və Füzuli rayonunun azadlığı uğrunda gedən döyüşlərdə böyük şücaət göstərib. Füzulidə gedən döyüşlər zamanı ömrünün 31-ci ilində qəhrəmancasına şəhid olub. Bununla da həyat qədər dəyərli ölümü milyonların ürəyində ona əbədi məkan qurub.
Azərbaycan Respublikası Silahlı Qüvvələrinin hərbi qulluqçularının medallarla təltif edilməsi haqqında Prezident İlham Əliyevin imzaladığı sərəncamlara əsasən Tərzan Haşımov ölümündən sonra "Azərbaycan Bayrağı" ordeninə, "Vətən uğrunda", Cəbrayılın və Xocavəndin azad olunmasına görə, "Cəsur döyüşçü" medallarına layiq görülüb.
Tərzan Həşimov yaşasaydı 34 yaşı tamam olardı. Şəhid qəhrəmanın doğum günü doğulub boya-başa çatdığı Bibihoni kəndində qeyd olundu. Kənd sakinləri, şəhid ailələri ilə bərabər, YAP Lerik rayon təşkilatının sədr müavini E.Məmmədov, rayon icra hakimiyyəti Vətən Müharibəsi və Şəhid Ailələri ilə işin təşkili şöbəsinin nümayəndəsi İ.Tahirov, Qarabağ Müharibəsi Əlilləri, Veteranları və Şəhid Ailələri İctimai Birliyinin Lerik rayon filialının sədri V.Məlikov, Səfərbərlik və Hərbi Xidmətə Çağırış üzrə Dövlət Xidmətinin Lerik rayon şöbəsinin nümayəndəsi E.Fətullayev, YAŞAT fondunun Lerik rayonu üzrə nümayəndəsi Ə.Rzayev qəhrəmanın uyuduğu məzarını ziyarət edib, önünə gül-çiçək dəstələri düzərək, əziz xatirəsinə dərin ehtiramını bildirdilər.
Zəfər ORUCOĞLU.