Şəhidlər bizim nisgilimiz, kədərimiz, ürək ağrımız, eyni zamanda qürurumuz fəxrimizdir. Gənc nəslə şəhidlərimizi tanıtmaq, onları vətənpərvər ruhda böyütmək, torpağa bağlı, xalqına hörmət hissi ilə tərbiyə etmək isə hər bir ölkə vətəndaşının ümdə vəzifəsidir. İmişli rayonunda da şəhidlik zirvəsinə ucalanlanların ailələrinə qayğı diqqət mərkəzindədir. Rayonun Otuziki kəndində Vətən müharibəsində şəhid olmuş XTQ giziri Quliyev Əli Tədbir oğlunun xatirəsinə inşa edilən bulağın açılışı oldu.
Açılış mərasimində İmişli Rayon İcra Hakimiyyətinin başçısı Elçin Rzayev, RİH-in məsul əməkdaşları, hüquq-mühafizə orqanlarının rəhbərləri, şəhid ailələri, müharibə iştirakçıları, ictimaiyyət nümayəndələri, şəhidin yaxınları və təhsil aldığı orta məktəbin müəllimləri ilə şagirdləri iştirak edirdilər. Mərasim iştirakçıları şəhid Əli Quliyevin məzarını ziyarət edib, ruhuna dualar oxuyub, üzərinə tər gül-çiçəklər düzdülər.
Azərbaycan Prezidenti İlham Əliyevin müvafiq sərəncamlarına əsasən ölkəmizin ərazi bütövlüyünün təmin edilməsi uğrunda döyüş əməliyyatlarında iştirakına, hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyinə, şəxsi igidlik və şücaət göstərdiyinə görə Quliyev Əli Tədbir oğlu ölümündən sonra "Cəsur döyüşçü", “Vətən uğrunda”, “Cəbrayılın azad olunmasına görə” və “Xocavəndin azad olunmasına görə” medalları ilə təltif edilib.
Mərasimdə çıxış edən İmişli Rayon İcra Hakimiyyətinin başçısı Elçin Rzayev 44 günlük Vətən müharibəsində şanlı zəfər qazanan Azərbaycan Ordusunun şəhidlərin qanını yerdə qoymadığını, Ali Baş Komandan cənab İlham Əliyevin rəhbərliyi ilə torpaqlarımızın işğaldan azad edildiyini və qazanılan Böyük Qələbənin tarixi əhəmiyyətini qeyd etdi. E. Rzayev şəhid Əli Quliyevin xatirə bulağının inşa edilməsində əməyi olan hər kəsə təşəkkürünü bildirib, şəhidin valideynlərinə Vətənimizin bütövlüyü uğrunda canından keçən belə bir igidi böyüdüb, boya-başa çatdırdıqları üçün təşəkkür etdi. Çıxış edənlər şəhidimizin göstərdiyi şücaətlərdən, qısa və şərəfli döyüş yolundan, onunla bağlı xatirələrindən danışdılar. Şəhidimizin atası Azərbaycan Prezidenti İlham Əliyevin və Birinci vitse-prezident Mehriban xanım Əliyevanın şəhid ailələrinin, qazilərin, müharibə iştirakçılarının qayğılarını daim diqqət mərkəzində saxladıqlarını onlara göstərdikləri diqqət və qayğıya görə minnətdarlığını bildirdi. Otuziki kənd tam orta məktəbinin şagirdlərinin şəhidlərimizə həsr olunan şeirləri səsləndirildi.
Ərəstun ABDULOV,
“Respublika”.