Öz qanları ilə Azərbaycanın şanlı tarixinə adını yazan igidlərdən biri də Tural Elşən oğlu Aslanovdur. Yardımlının Çayüzü kəndində boya-başa çatan Turalın müstəqil həyata qədəm qoyanda birinci istəyi əyninə əsgər paltarı geyinib Vətən torpağını qorumaq, döyüşərək erməni faşistlərinə qalib gəlmək olur. Elin qəhrəman oğlu Tural ömrünün 28-ci ilində İkinci Qarabağ müharibəsində arzusuna çatır. Cəbhəyə könüllü gedir, Şuşaya qədər döyüş yolu keçir. Noyabrın 7-də qələbənin bir addımlığında qalib ölkənin şəhid övladı kimi əbədiyyətə qovuşur. Mənalı həyat yolu ilə Vətənə, millətə sədaqət nümunəsi olur.

2013-cü ildə Tural Aslanov Azərbaycan Silahlı Qüvvələrinin sıralarında müddətli həqiqi hərbi xidmətə başlayır. İlk gündən cəsurluğu, qorxmazlığı, vətənpərvərliyi ona hörmət gətirir. Təlimlərdə fəallıq göstərir, cəbhə xəttində düşmənlə qarşı-qarşıya gəldiyi günləri də olur. Vətən, torpaq keşiyində ayıq-sayıq dayanan əsgər yağıya yerini göstərə bilir. Həm də başa düşür ki, torpaqları işğal altında olan bir ölkə üçün hərbçi sənəti hər şeydən vacibdir. Odur ki, zabitlik kursunda oxuyub leytenant rütbəsini alır. Və sonra seçdiyi sənətinin kamil bilicisi olmaqdan ötrü bütün çətinliklərə dözür. Tərxis olunana qədər xidməti vəzifəsinin öhdəsindən layiqincə gəlir, Vətənin haqq işində hər an ona qurban getməyə hazır olmağı ilə əsgərlərin, zabitlərin arasında yaxşı ad qoyur.

Azərbaycan Ordusunun leytenantı Tural Aslanov 2020-ci il sentyabrın 27-də başlanan İkinci Qarabağ müharibəsində Cəbrayılın, Füzulinin və Şuşanın azadlığı uğrunda gedən savaşda böyük hünər göstərir. Neçə dəfə ölümlə üz-üzə dayanır, qeyri-bərabər döyüşlərin iştirakçısı olur. Doğma Azərbaycana qəlbən bağlılığı onu çox ağır sınaqlardan çıxardır. Ən qaynar nöqtələrdə yağıya qan uddurur. Şuşanın nəfəsini hiss etdikcə isə qəhrəman Turalın damarlarında qanı coşur, dığalardan hər qarış Vətən torpağının qisasını almaq üçün silahdan daha da möhkəm yapışır. Sinəsini gülləyə sipər etməklə arzuladığı qələbəyə çatır. Özü Şuşada şəhid olsa da, xalqına, millətinə zəfər sevincini yaşadır...

İndi yeri cənnət olan, adı Vətəndə iftixarla çəkilən igid döyüşçü Tural bütün Azərbaycan üçün əzizdir. Dövlət tərəfindən də onun xidmətləri unudulmadı. Ölümündən sonra layiq görüldüyü 3-cü dərəcəli "Vətənə xidmətə görə" ordeni, "İgidliyə görə", "Şuşanın azad olunmasına görə", "Vətən uğrunda" medalları ilə təltif edilib.

 Zəfər ORUCOĞLU.