Dünyaya göz açdığı gündən Vətən sevgisi ilə boy atan Elnur Cəlal oğlu Dadiyev bu ilahi sevginin qanadlarında əbədi olaraq milyonların ürəyində yaşamaq hüququnu qazandı. Onun ömür yolu 22 il çəkdi. Qısa həyatı qüruruna, vüqarına, mərdliyinə, bağlandığı millətinə şərəf gətirdi. Qəlbi sevdalı lerikli balası Vətən müharibəsində 30 il qəddar erməni dığalarının əsarətində olmazın bəlalar çəkən əzəli yurd yerimiz Qarabağ torpaqlarının azadlığı naminə canını fəda etməyi bacardı.
Elnur Lerik rayonunun Buruq kəndində anadan olmuşdur. Dağlar oğlunun ailəsi Bakı şəhərinə köçür, Sabunçu qəsəbəsində özlərinə yurd-yuva qururlar. Elnur 14 saylı Bakı Peşə liseyində oxuyub dərzilik sənətinə yiyələnir. 2016-cı ildə onu Lerik Rayon Hərbi Komissarlığı tərəfindən həqiqi hərbi xidmətə göndərirlər. Cəbhə bölgəsində Vətəninin keşiyində durmağı özünə böyük şərəf sayır. Onu göz bəbəyi tək qorumaqla əsgərlərin, komandirlərin ürəyinə nüfuz edir, hörmət qazanır. Yeri gələndə, bir sıra əməliyyatlarda müqəddəs Vətən torpaqlarına göz dikən yağı düşmənə yerini göstərməyi də bacarır.
Əsgərlikdən sonra Elnur ailəsinə kömək etmək məqsədilə dərzi işləməyə başlayır. Xoşbəxtliyini Vətəninin azadlığında, insanlara nümunəvi xidmətdə görən sağlam əqidəli gənc səliqəli, zövq oxşayan işi ilə evə yaxşı qazanc aparır. Təkcə onu narahat edən erməni dığalarının Qarabağımıza təcavüzü olur. Hər an Vətən torpaqlarının bir qarışı da düşmən ayaqları altında qalmasın deyə, güllə qabağına getməyə hazır durur. Odur ki, Elnur İkinci Qarabağ müharibəsi başlanan andan xüsusi göstəriş gözləmədən düşmənlə müharibəyə atılır. Füzuli və Xocavənd uğrunda gedən ağır döyüş meydanında mərdliyi, cəsarəti qəhrəmanlıq tariximizə düşür. Azad olunan torpaqlar qəlbindəki Vətən sevgisini bir daha coşdurur. Ölümün gözünə dik baxa-baxa sərrast atəşlə ermənilərin neçə-neçə texnikasını, canlı qüvvəsini məhv edir. 26 oktyabr 2020-ci il tarixində şəhid olur.
Lerikli balası Vətənin hər qarışını canından əziz bilirdi. Dağlar diyarı Lerikdə dünyaya gəldi, sinəsinə əbədi baş qoyduğu torpaq Zabrat qəbiristanlığı oldu. Dövlət tərəfindən layiq görüldüyü “Vətən uğrunda”, “Füzulinin azad olunmasına görə”, “Xocavəndin azad olmasına görə” medalları bizlərə yaxşı təsəllidir...
Zəfər ORUCOĞLU.