Lerikin qartalı dağlardan qürur alan, qəlbi məhəbbətli mərd övladı Davud Xeyrulla oğlu Şirvanov əzəli-əbədi yurdumuz Qarabağın azadlığı uğrunda sevdalandığı Vətənin qeyrətini hər şeydən üstün tutmaqla şirin canını onun yolunda qurban etməyi bacardı. 1994-cü ildə Lerik rayonunun Livədirqə kəndində dünyaya göz açan dağlar diyarının igid oğlu ömrünün 26-ci baharında elə bir tarix yazdı ki, onun adı heç vaxt qəlblərdən silinməyəcək.
Davud el-obanın xoşbəxtliyi naminə saf, ülvi hisslərlə yaşaya bilirdi. O, müstəqil həyatına müqəddəs əməllərə tapınmaqla qədəm qoyur. Gördüyü yaxşı işlərlə tez də tanınır, sevilir. 2012-ci ildə əsgərlik yaşına çatanda ətrafı Davudun Vətənə layiqli övlad olacağına tam inanır.
Bəli, Davud cəbhə bölgəsində layiqli bir övlad kimi doğma Azərbaycan qarşısında borcunu şərəflə yerinə yetirir. Qarabağı zəbt edən, öz alçaq əməlindən qalmaq istəməyən erməni dığaları dəfələrlə Davudun Vətəninə, torpağına olan sədaqəti qarşısında məğlub duruma düşürlər. Əsgər yoldaşlarına da töhfəsi bu olur: “Vətəni qorumaq, çətin məqamda onun yolunda canından keçmək bizim oğulluq borcumuzdur”.
Davud əsgərlikdən sonra kəndində halal zəhmətin qulpundan yapışır. Gördükləri ilə cəmiyyətə böyük faydası dəyir, nəticədə yaxşı insan kimi qəlblərdə özünə yurd salır. Beləcə kəndində həyatı firavan keçsə də, Qarabağ dərdi onu rahat buraxmır. Vətən torpaqlarının azadlığı naminə hərbiyə yazılır. Cəsurluğuna, igidliyinə, mərdliyinə güvənib Davudu Füzuli rayonundakı “N” saylı hərbi hissədə MAXE kimi xidmətə götürürlər.
Vətən müharibəsi başlanan kimi Davud özünü döyüş meydanına atır və deyir: “Vətən onu sevən, canı-qanı qədər istəyən mərd övladları sayəsində azadlığa qovuşur”. Zəfərə getdiyimiz haqq yolunda Davud dəfələrlə odun-alovun içindən keçir. Yüksək şəxsi rəşadəti, şücaəti onunla döyüş meydanında olan əsgərləri də qələbəyə aparır. Sinəsini Vətənə sipər edən igid döyüşçü oktyabrın 2-də daxil olmaqla düşmənə qan qusdurur. Onun qurduğu istehkamlarını, çoxlu sayda zirehli texnikasını, canlı qüvvəsini məhv edir. Düşməndən ürəyincə intiqamı alandan sonra ömrünü Vətəninə verir. Bu da ona ölməzlik qazandırır.
Lerik camaatı üçün Davudun adı çox əzizdir, igid oğlunu qəlbində yaşatmaqla hər zaman, hər yerdə onun şərəfini uca tuturlar. Dövlət tərəfindən ölümündən sonra aldığı “Vətən uğrunda”, “Füzulinin azad olunmasına görə” medalları da Davudun həqiqətən doğma Azərbaycan üçün ömrünün yaşamasına bir nümunədir.
Zəfər ORUCOĞLU.