Almaniyada yaşayan və fəaliyyət göstərən beynəlxalq hüquq üzrə ekspert Asəf Əsgər Xocalı soyqırımının 32-ci ildönümü ərəfəsində Almaniya Federativ Respublikasının prezidenti Frank-Valter Ştaynmayerə və kansler Olaf Şoltsa müraciət ünvanlayıb. Müraciətdə Xocalı soyqırımının bəşər tarixinin ən amansız qətliamlarından biri olduğu, bir gecədə 63-ü uşaq, 106-sı qadın, 70-i qoca olmaqla, ümumilikdə 613 nəfərin qəddarlıqla qətlə yetirildiyi, o cümlədən 8 ailənin tamamilə məhv edildiyi,1275 nəfərin əsir götürüldüyü və əsir götürülən 150 nəfərin, o cümlədən 68 qadın və 26 uşağın taleyinin hələ də məlum olmadığı bildirilib.

Müraciətdə qeyd edilib ki, Avropa İnsan Hüquqları Məhkəməsi 22 aprel 2010-cu il tarixli qərarında Xocalının mülki əhalisi olan azərbaycanlıların məhv edilməsini "müharibə cinayəti və ya insanlığa qarşı cinayət" kimi qiymətləndirib.

Bundan əlavə, Xocalıda törədilənlərin BMT Baş Assambleyasının 21 dekabr 2010-cu il tarixli qərarına, 1949-cu il Cenevrə Konvensiyalarına, Soyqırımın qarşısının alınması və cəzalandırılması haqqında Konvensiyaya, Mülki və Siyasi Hüquqlar haqqında Beynəlxalq Pakta, İqtisadi, Sosial və Mədəni Hüquqlar Haqqında Beynəlxalq Pakta, İşgəncələrə və digər qəddar, qeyri-insani, yaxud ləyaqəti alçaldan davranış və cəza növlərinə qarşı Konvensiyaya, İrqi Ayrı-seçkiliyin Bütün Formalarının Ləğvi haqqında Beynəlxalq Konvensiyaya, İnsan hüquqlarının və əsas azadlıqların müdafiəsi haqqında Konvensiyaya, Uşaq hüquqları haqqında Konvensiyaya tamamilə zidd olduğu bildirilib.

Müraciətin sonunda dünyada sülh və əmin-amanlığın bərpası, zorakılıqların qarşısının alınması üçün Xocalı soyqırımının tanınmasının vacibliyi vurğulanıb.

"Respublika".