Qida sektorunda iri şirkətlərdən birinin şəbəkə və data serverlərinə kiberhücum edən dəstə üzvləri saxlanılıb.

Daxili İşlər Nazirliyindən yayılan məlumata əsasən "Respublika" xəbər verir ki, kiberhücumu həyata keçirən şəxslərin şifrələnmiş məlumatları təhlil olunub və tətbiqi proqram təminatları vasitəsi ilə həmin şəxslərin kimliyi və kordinat məlumatları təyin edilib. 

Keçirilən əməliyyat-texniki tədbirlər nəticəsində cinayəti törədən dəstə üzvləri Murad Rzayev, İbrahim Ələsgərov və Elvin Əliməmmədov xüsusi alqoritmlərdən və sosial mühəndislik üsullarından istifadə edərək şirkətin serverlərində yerləşən kommersiya sirri təşkil edən məlumatlara məsafədən giriş etməyə müvəffəq olmaqla ələ keçirdikləri məlumatları 60 000 manata satarkən saxlanılıblar.

Onlar məlumat axınının davamlığını təşkil edəcəklərinə dair vədlər verərək hər ay üçün əlavə 10 000 manat ödəniş tələb ediblər.

Faktla bağlı Cinayət Məclləsinin 271.2.2 (qabaqcadan əlbir olan bir qrup şəxs tərəfindən kompüter sisteminə qanunsuz daxilolma) və 272.2.2 (qabaqcadan əlbir olan bir qrup şəxs tərəfindən kompyuter məlumatlarını qanunsuz ələ keçirmə) maddələri ilə cinayət işi başlanılaraq adıçəkilən şəxslər barəsində həbs qətimkan tədbiri seçilib

Töhfə SƏMƏDOVA,

"Respublika".