Cari ilin birinci rübü ərzində vergi orqanlarına ümumilikdə 32 min 459 müraciət daxil olub ki, bu da ötən ilin müvafiq dövrü ilə müqayisədə 2,1 faiz azdır.

"Respublika" Dövlət Vergi Xidmətinə istinadla xəbər verir ki, müraciətlərdən 96,3 faizi ərizə, 3,6 faizi şikayət, qalan hissəsi isə təklif olub. 50 müraciətin icrası nəzarətə götürülüb.

Müraciətlərin 93,8 faizinin baxılması bu ilin 1-ci rübü ərzində başa çatdırılıb, 6,2 faizi isə hazırda icradadır. Baxılmış müraciətlərdən 66,8 faizi həll olunub, digərləri barədə qanuna müvafiq tədbirlər görülüb.

Müraciətlərin tərkibində faktiki şikayətlərin sayı 2588 olub və əvvəlki ilin müvafiq dövrü ilə müqayisədə 30,2 faiz azalıb. Həll edilmiş şikayətlərin 76,3 faizi kameral vergi yoxlamaları, qalan hissəsi isə vergi borcları, vergiödəyicisinin qeydiyyatı, şəxsi hesab vərəqələri, sosial sığorta ödənişləri, maliyyə sanksiyasının silinməsi, operativ vergi nəzarəti, vergi mükəlləfiyyəti və digər məsələlərlə bağlı olub.

2024-cü ilin birinci rübündə Dövlət Vergi Xidmətinin aparatında müvafiq vəzifəli şəxslər tərəfindən ümumilikdə 119, o cümlədən şəhid ailəsi və müharibə iştirakçısı olan 11 vətəndaşın qəbulu təşkil edilib.